Слатко од зрели смокви со прекрасен мирис и густ, проѕирен шербет – едно од оние традиционални слатка што потсетуваат на лето и на домашната кујна.

Состојки:

• 2 кг смокви, излупени
• 1,5 кг шеќер
• 400 мл вода
• 1 лимон исецкан на листови

• 1 лажица сода бикарбона
• 2 литри вода

Подготовка: Смоквите излупете ги внимателно и ставете ги во 2 литри вода во која сте раствориле 1 лажица сода бикарбона. Оставете ги да отстојат 30 минути. Потоа убаво исплакнете ги смоквите со ладна вода и оставете ги да се исцедат. Во широка шерпа ставете го шеќерот и 400 мл вода. Варете додека да се растопи шеќерот и да се добие шербет. Додајте ги смоквите и варете на умерена температура околу 60 минути. Додајте ги листовите лимон и варете уште 30 минути за да пуштат убав мирис.

Тргнете го слаткото од шпорет и покријте го со влажна памучна крпа. Оставете го да се лади и да отстои 24 часа. Следниот ден наполнете го во чисти и стерилизирани тегли и добро затворете.
 За да останат смоквите цели и убави, варете ги на умерена температура и не мешајте со лажица, туку само повремено протресете ја шерпата.

На здравје!